.jpg)
‘उमेरले डाँडा काटेपनि रगत त अझैपनि तातो छ,’ ६१ वर्षिया धनकुमारी लुईटेलले भनिन्, ‘म यी सबैकी डन हुँ ।’ उनले यसो भन्दा कलालयमा उपस्थित उनकी बुहारी र नातिनीसहित उनीहरुकै उमेरका डेढ दर्जन महिलाहरु हाँसे । उनीहरु धनकुमारीको खिल्लि उडाउँदै थिएनन्, बरु सहि थाप्दै थिए ।वृद्धा उमेरमा पनि आफ्नी नातिनी रेणुकला र बुहारी कृष्णकुमारीसँगै कलालय इटहरीमा अभिनय सिक्नको लागि आउन थालेकी छिन् । बोलीमात्र होइन, उनको अभिनय सिक्ने चाहनामा समेत फूर्ती छ । अधिकांश सासुहरु बुहारीलाई घरभित्रै कज्याएर राख्न चाहन्छन्, तर उनले भने बुहारी र नातिनीलाई समेत सँगै अभिनय सिक्न प्रोत्साहित गरेकी छिन् । ‘मेरा उमेरमा मेरो ठाउँमा यस्तो कसैले सिकाउँदैनथे,’ दुई वर्ष अघि मात्र इटहरी आएकी उनले भनिन्, ‘म आफ्ना छोरीबुहारी र नातिनीहरुलाई हौसला दिन आएकी हुँ ।’
लुईँटेल र कोइरालासँगै १२ जना भन्दा बढी महिलाहरु अहिले तीजको तयारीका लागि नाटक प्रशिक्षणमा सहभागि छन् । धेरै महिलाहरुले गरगहनाको प्रदर्शनी गर्दै रमाइलो गर्ने पर्वका रुपमा मात्रै तीज मनाउँदै आएकोसमयमा उनीहरु भने सामाजिक सन्देश दिने नाटक प्रदर्शन गर्ने भन्दै कस्सिएका हुन् ।
पाँच दर्जन बढी बालबालिकाहरुलाई प्रशिक्षण दिइ नाटकको नयाँ पुस्ता तयार गरिरहेको कलालयलाई महिलाहरुको यस्तो सहभागिताले थप उत्साहित बनाएको कलालयका अध्यक्ष सोनु जयन्तीले बताए । महिलाहरु आफै जागरुक भइ यसरी नाटक सिकेको यो पहिलो घटना भएको बतााउँदै उनले नाटकलाई तीज पछि पनि निरन्तरता दिन सकेमा इटहरीको कला क्षेत्रमा एउटा नयाँ अध्याय थपिने उनले दावी गरे ।
0 comments:
Post a Comment